"ურბანულ სამყაროში დიზაინის ერთ-ერთი მთავარი ამოცანაა — ქალაქის სწრაფ რიტმსა და დროის მუდმივ ნაკლებობაში, მაცხოვრებლებს მაქსიმალური რელაქსაციის საშუალება მისცეს. შემდეგი ამოცანა იმ გარემოს წარმოდგენაა, რომელშიც მაცხოვრებელი თავს კომფორტულად იგრძნობს, ხანდახან ეს სივრცეში სიმსუბუქისა და სისადავის შემოტანით კეთდება, ხან კი, ინტერიერში დინამიური, ფერებით ცოცხალი და მკვეთრი დეტალების გადათამაშებით.

ფერადი, სახასიათო დეტალებით შეკრული პროექტის VIBRANT DREAM პირველი სართული გახსნილი სივრცეა, რომელიც აერთიანებს სამზარეულოს, სასადილოსა და მისაღებ ნაწილს. მათ შუაში მოქცეული მუქი აგურისფერი დივანი აუზზე გამავალ ვიტრაჟებთან ტანდემში ერთგვარ კუნძულს ქმნის, ხოლო მისი ორმხრივობა კომფორტულობის მიღმა, სივრცეში ერთდროულად ერთიანობისა და დისტანციის შეგრძნებას გვიტოვებს. მკვეთრი დეტალები – როგორიცაა საინტერესო ფორმის ჭაღი სახელად Levante, პასტელური მწვანე, მომრგვალებულკუთხეებიანი მაგიდა და შავ-თეთრი ქსოვილით გაწყობილი სავარძელი კონტრასტში მოდის ტელევიზორის სადა კედელთან, რომელიც შავ მინებს შორის მოქცეული ტელევიზორის გამო, ერთიანი დიდი ეკრანის ილუზიას გვიქმნის.

მისაღები სივრცის დიდი მცენარეები საინტერესოდ ირეკლება კუპერის ფერის მეტალის ფირფიტებით გაფორმებულ კიბეზე, რომლის მასიურობა არეკვლადი ელემენეტების წყალობით ჰაეროვანი ხდება და მთავარ დეკორატიულ ელემენტადაც გვევლინება. მეტალის არეკვლად ფირფიტებში პირველსა და მეორე სართულის საზღვარზე ჩამოკიდებული, ესპანური ბრენდის Parachilna სახასიათო ჭაღიც ირეკლება, რომელიც მეტალის 100 ერთმანეთში სინქრონულად შერწყმული ხაზებისგან შედგება და თავის მხრივ ულამაზეს შუქ-ჩრდილებს აკეთებს. ამასთანავე, კიბე დეკორატიულობასთან ერთად ფუნქციურობასაც ითავსებს, კერძოდ, პატარა, მყუდროდ მოწყობილი ბიბლიოთეკით, რომელშიც Flos-ის პრაქტიკული სანათი კიდევ უფრო კარგად მოკალათების საშუალებას გვაძლევს.

მეორე სართულზე განთავსებული საძინებლების სივრცე კიდევ უფრო ცოცხალია ფერებით, რომელთაგან თითოეულს შენარჩუნებული აქვს საკუთარი ინდივიდუალური მახასიათებელი. თუ ერთი საძინებელი თაღის კონცეფციაზეა აგებული და თაღოვან ფორმებში მოქცეული ფერადი კედლებით გამოირჩევა, მეორე ოთახი აგურისფერს სხვადასხვა კუთხეში იმეორებს და მონოტონურ ფერადოვნებაში ერთგვარი დინამიკა შემოაქვს. მესამე კი - მთავარი საძინებელი მუქი ლურჯით გამოკვეთილი დეტალებითა და მცენარეებისთვის განკუთვნილი დეკორატიული შემინვებით, შედარებით სოლიდურ, თუმცა მაინც მთლიანი სახლის ხასიათს ინარჩუნებს.

ერთიანობაში, სახლის Vibrant Dream კონცეპტს იდეალურად კრავს მცენარეების ბუნებრივი ელემენტი, რომელიც ინტერიერში ფერებს კიდევ უფრო ცოცხალს ხდის, ატმოსფეროს სიმშვიდეს ანიჭებს და ამასთანავე, საერთო დიზაინში დამატებითი ხიბლი შემოაქვს. მკვეთრი შთაბეჭდილებებისა და დახვეწილობის შორის ზომიერების დაცვით, სიდიდის მიუხედავად, სივრცე არა გაფანტული, არამედ მსუყე და შეკრულია, რაც საბოლოოდ, მაცხოვრებლების ახდენილი ოცნება ხდება — დიდი, მყუდრო სახლი — ფერადი, სახასიათო დეტალებით."