"კომფორტი საბაზისოა. განტვირთვა და პრაქტიკულობა კი ის, რაც თანამედროვე ადამიანს მის შესაქმნელად სჭირდება.

პროექტი LINEAR სწორედ ამ პრინციპულ საჭიროებებს პასუხობს და მინიმალიზმს სამ ძირითად დეტალზე აგებს: სუფთა ხაზები. მინიმალური დეკორი. სადა ფერთა პალიტრა. ბინაში ყველა ზედაპირი გლუვია და არცერთი მასალა არაა გამოკვეთილი, რაც ბინის საერთო ხასიათს კიდევ უფრო ჰაეროვანს ხდის. კედელში ჩასმული ალუმინის ზოლები განათებებით კი, ამ სიმსუბუქეს მეტ დინამიურობას ანიჭებს.

ბინის მცირე კვადრატულობამ წინააღმდეგობის მაგივრად, კიდევ უფრო მეტი შესაძლებლობა მოგვცა იმისთვის, რომ სივრცე პრაქტიკულად აგვეთვისებინა. სასადილო ზონასა და სამზარეულოს შორის არსებულმა პატარა კუნძულმა შეასრულა როგორც ტიხრის, ისე სათავსოების ფუნქცია. ხოლო ორი პასტელური ფერის - ღია და შედარებით მუქი კაკაოსფერის გადათამაშებით და ფორმების სწორხაზოვნებით საინტერესო დიზაინი სივრცის გადატვირთვის გარეშე შეიქმნა.

მაგრამ სრულყოფილების აღქმას კონტრასტი სჭირდება ხოლმე. სწორედ ამიტომ, ბინაში მწვანე ფერი შემოვიტანეთ: მცენარეებს და მწვანე დივანს გონება ასოციაციურად ბუნების საწყისებთან მიჰყავს, შესაბამისად, გარემოში ჰარმონია და სიმშვიდე შემოაქვს.

პროექტი LINEAR მაცხოვრებლის საბაზისო მოთხოვნილებები დახვეწილ და პრაქტიკულ დიზაინში გადმოაქვს და ქმნის სივრცეს, სადაც დატვირთული დღის შემდეგ შესვლისას სიმსუბუქეს იგრძნობ.
"