"როგორ სახლში დაბრუნდებოდა საკულტო ქალის პროტოტიპი, ელეგანტურად გაკრული შარფით, სათვალეებითა და ხელთათმანებით, რომელიც სანაპიროების გავლით, რეტრო სტილის ავტომობილით მოგზაურობს?

გადავწყვიტეთ ბინა HER-ში სწორედ ეს დახვეწილი მაძიებლობა გაგვეცოცხლებინა, რაც მისაღები სივრცეების მრავალფეროვნებაში ვთარგმნეთ.

სამზარეულო ბარით, სასადილო და მისაღები ერთ სივრცეშია, თუმცა ისინი მაინც ახერხებენ ბინაში ერთმანეთისგან დამოუკიდებელი, უნიკალური ხასიათის შენარჩუნებას. ეს ტრიო იძლევა შესაძლებლობას ბინაში შეიქმნას ატმოსფერო როგორც იტალიური ვახშმის საღამოებისთვის, ისე ღვინის თანხლებით ბართან მუსიკის მოსმენისა ან მყუდროდ, ჭიქა ყავაზე მეგობართან საუბრისთვის.

მაძიებლობას ყოველთვის თან ახლავს თავგადასავალიც, ამიტომ მისაღებში იმავე შინაარსის გადმოსატანად, პასტელურ ფერთა გამას დავამატეთ ერთი კონტრასტული დეტალი — მუქი მწვანე სავარძელი, სახელად Redondo (ბრენდი Moroso), რომელიც ცნობილ დიზაინერს პატრისია ურკიოლას ეკუთვნის და ინსპირირებულია 50-60 წლების ამერიკული მანქანებით, რომელთა ყველაზე სახასიათო შტრიხს გაერთიანებული, რბილი სავარძლები წარმოადგენს.
მისაღები კუთხის ცენტრს განსაკუთრებულ სიფაქიზეს სძენს მსუბუქი მინისგან დამზადებული მაგიდა (ბრენდი Glas Italia), რომელიც იმეორებს მარმარილოს ფერსა და ძარღვებს და ამით სხვადასხვა პერსპექტივიდან სხვადასხვა ვიზუალურ ეფექტს გვაძლევს. 


სამზარეულო ბინის ის ნაწილია, სადაც ყველაზე მეტი სისადავე გვხვდება, მაგრამ აქაც, ბუნებრივი ქვისთვის დამახასიათებელი ფაქტურის ფილებითა და კრემისფერი მინის ფასადის კომბინაციით, ელეგანტურობას კიდევ ერთხელ გავუსვით ხაზი.

მესამე სივრცის, სასადილოს ფორმების კონცეფცია ასევე ცნობილი დიზაინერის, მარსელ ვანდერის ჭაღის, Zeppelin-ის (ბრენდი Flos) საფუძველზე ჩამოყალიბდა. მიუხედავად დიდი ზომისა, განათება ღრუბელივით ჰაეროვნად დალივლივებს სივრცეში, სკამები კი ასოციაციურად იმეორებენ ჭაღის ფორმას და ინტერიერს კიდევ უფრო მეტ ელეგანტურობას სძენენ.

როდესაც დიზაინი ერთ, მკაფიოდ დანახულ შინაარსზე დაყრდნობით იწყებს გაცოცხლებას, ეს ხასიათი რბილად და ბუნებრივად ვრცელდება მთელ ბინაზე.
სწორედ ამიტომ იკითხება HER პროექტში ასე კარგად ელეგანტურობა სათავგადასავლო
ელემენტებით. "